АБ ВІЗІЦЕ Ў ЕГІПЕТ

У рамках афіцыйнага візіту ў Арабскую Рэспубліку Егіпет Прэзідэнта Рэспублікі Беларусь Аляксандра Лукашэнкі 20 лютага 2020 года ў новай адміністрацыйнай сталіцы Егіпта ў шматфункцыянальным комплексе "Al Masah Capital" праведзена першае пасяджэнне Беларуска-Егіпецкага Савета дзелавога супрацоўніцтва ў фармаце бізнес-форуму.

У рамках пасяджэння прайшлі прэзентацыі навукова-тэхнічнага патэнцыялу Рэспублікі Беларусь, перспектыўных інвестыцыйных праектаў. Удзельнікі форуму абмеркавалі пытанні двухбаковага гандлёва-эканамічнага ўзаемадзеяння, экспарту і імпарту тавараў і паслуг, перспектывы пашырэння кантактаў дзелавых колаў, стварэння сумесных прадпрыемстваў.

Па выніках пасяджэння падпісана 13 кантрактаў на агульную суму каля 44 млн. беларускіх рублёў.

 

Акрамя таго, 20 лютага бягучага года ў новай адміністрацыйнай сталіцы Егіпта на тэрыторыі комплексу была арганізавана выстава "Беларусь-Егіпет: партнёрства, звернутае ў будучыню".

У ходзе выставы Прэзідэнтам Беларусі і Егіпта былі прадэманстраваны сумесныя навукова-тэхнічныя распрацоўкі Нацыянальнай акадэміі навук Беларусі і акадэміі навуковых даследаванняў Егіпта, а таксама сабраныя ў Егіпце ўзоры тэхнікі ААТ «МТЗ», ААТ «МАЗ», ААТ «Амкадор», ААТ «Бабруйскаграмаш», ААТ «Мінскі маторны завод» і інш. Усяго ў выставе прынялі ўдзел 37 беларускіх прадпрыемстваў.

Па заканчэнні гэтых мерапрыемстваў адбылася сустрэча сустаршыняў Беларуска-Егіпецкай сумеснай гандлёвай камісіі: Міністра антыманапольнага рэгулявання і гандлю Рэспублікі Беларусь Уладзіміра Калтовіча і Міністра гандлю і прамысловасці Арабскай Рэспублікі Егіпет Невін Гамеа.

Падчас сустрэчы бакі абмеркавалі апошнія даручэнні кіраўнікоў дзяржаў, дадзеныя напярэдадні, а таксама актуальныя пытанні двухбаковага ўзаемадзеяння ў розных галінах: гандлю і інвестыцый, прамысловасці, турызму і інш.

Адзначаны станоўчы ход вырашэння пытання допуску прадукцыі, вырабленай у Егіпце на сумесных прадпрыемствах, да ўдзелу ў праводзімых у Егіпце тэндэрах. У пачатку снежня 2019 года урадам Егіпта было прынята адпаведнае рашэнне.

Падкрэслена неабходнасць поўнай і своечасовай рэалізацыі Комплекснай праграмы (“дарожнай карты") развіцця супрацоўніцтва паміж Рэспублікай Беларусь і Арабскай Рэспублікай Егіпет на 2019 – 2020 гады, падпісанай сустаршынямі Беларуска-Егіпецкай сумеснай гандлёвай камісіі 18 чэрвеня 2019 года ў г.Мінску, а таксама неабходнасць хутчэйшага адкрыцця Пасольства Арабскай Рэспублікі Егіпет у Рэспубліцы Беларусь.